તવ સ્મરણ

(આજે જન્માષ્ટમી નો પવિત્ર તહેવાર છે. શ્રી કૃષ્ણનો જન્મદિન. કૃષ્ણ એટલે પ્રેમભક્તિનું પ્રતિક. આજે એક બહુ જ સુંદર ગઝલ યાદ આવી, 'જ્યાં જ્યાં નજર મારી ઠરે યાદી ભરી ત્યાં આપની' કૈંક આવી જ અનુભૂતિ મને થઇ છે જે અહિં શબ્દદેહે ઉતારી છે. આશા છે ગમશે.) 

તવ સ્મરણ 

વન વગડામાં, એક કાળે,

ધોમ ધખે, ખેચર માળે

બંદા બેઠા ઝાડની ડાળે,

                              અંતરતમ બસ, તને ભાળે                                

સૂના સરવરની પાળે,

તિમિર નાદને તમરાં ખાળે

રજની શ્યામ રંગ ઉછાળે

બિંદુ બનું હું તારા કપાળે.

ગોપાળ ગોધન વાળે

કેસૂડા સંધ્યા કાળે

તોફાની ઝરણાની ધારે

બસ તવ સ્મરણ મુજ ફાળે

સુખમાં સ્મરણ કર્યું ક્યારે?

દુ:ખમાં જ તું સાંભરે જ્યારે

બસ એક અભિલાષા, અંત:કાળે

                              પ્રિય! કાશ, તું મને સંભાળે!                                 

(19/7/12)