ખારવા વિના મારે ખૂંદવા છે દરિયા....

(ગત શુક્રવારે 'છૂના હે આસમાન-6 પંગુમ્ લંઘયતે ઉદધિમ્' શ્રેણીમાં આપણે અવયવ રહિત તરવૈયા ફિલિપ્પે ક્રોઇઝોનનો પરિચય કર્યો. આ તરવૈયાની એક સુંદર તસવીર માધ્યમોમાં પ્રકાશિત થઇ છે. આ તસવીર પરથી મને મુર્ધન્ય કવિ સ્વ.શ્રી ઉમાશંકર જોષીનું ગીત “ભોમિયા વિના મારે ભમવા’તા ડુંગરા” યાદ આવ્યું. પણ અવયવ વિનાનો આ મર્દ તો દરિયો ખેડવા નીકળ્યો છે! આથી કવિવર જોષીના ગીતનો આધાર લઇ મેં મારી કલ્પનાના રંગે ક્રોઇઝોનનું વિશ્વતરણ આલેખ્યું છે.)

ફિલિપ્પે ક્રોઇઝોનને સમર્પણ...

            લા’ રૉશેલના દરિયામાં તરતો અવયવ વિનાનો ફ્રેંચ તરવૈયો ફિલિપ્પે ક્રોઇઝોન  27/05/2010.                                   

ક્રોઇઝોને હાલમાં મહાસાગર તરવાનું બીડું ઝડપ્યું છે.     તસવીર: AFP NEWS.COM.AU

ખારવા વિના મારે ખૂંદવા છે દરિયા.

સાગરની છોળે મહાલવું છે.

તરવી છે ચેનલ ને જોવાં છે બંદરો

ઉદધિના ખોળે આળોટવું છે.

ફેનિલ તરંગોની અણિયાળી ટોચે

રશ્મિની હાર મારે ગણવી છે

ખૂવે ઝૂલંત પેલા પીંજરિયાની

અંતરની વેદના વણવી છે.

એશિયા, ઓસનીયા ને યોરપ  સંગાથે

અમરિકા, આફ્રિકાના અણદીઠ કાંઠે

નાખુદા ખોવાય ને જળચર નાઠે

તેવા સાગરની ગોદમાં રમવું છે.

અફાટ સમુંદરના અતલ ઊંડાણે

આશાની માછને ઝીલવી છે.
ઉદધિને નાથવાની નિત્ય મથામણે

પાંખે અવયવે પોંખાવવું છે.

ખારવા વિના મારે ખુંદવા છે દરિયા.
સાગરની છોળે મહાલવું છે.

                       -ભજમન (19/05/2012)

રશ્મિ = કિરણ, પ્રકાશ આપતી માછલી

ખૂવો = કૂવાથંભ, 

(મુર્ધન્ય કવિશ્રેષ્ઠ સ્વ. ઉમાશંકર જોષીની ક્ષમાયાચના સાથે)